Komisioneri i BE-së për zgjerim, Stefan Fyle tha se çdo nismë rajonale duhet të jetë gjithëpërfshirëse. Ai këtë deklaratë lidhur me anulimin e samitit të presidentëve e bëri në Ohër ku sot mbahet Konferenca e Ministrave të Jashtëm të Evropës.


“Ky bashkëpunim, megjithatë, duhet të jetë gjithëpërfshirës, kurse konsensusi për pranimin e Kosovës duhet të arrihet. Një gjë të tillë do të mbështetë edhe BE-ja. Normalizimi i marrëdhënieve ndërmjet Beogradit dhe Prishtinës është proces i gjatë dhe ndihmesa e vendeve të rajonit do të ketë rol të rëndësishëm në përmbylljen e këtij procesi”, ka thënë Fyle.

Stefan Fyle porositi liderët e Ballkanit Perëndimor që të ndjekin shembullin e Prishtinës dhe Beogradit për kapërcimin e dallimeve mes tyre.

“Me rëndësi për mua është gjithëpërfshirja në takimet e tillë, ashtu si sot që jemi ulur në të njëjtët tryezë përfshirë edhe Kosovën si mysafire speciale”, tha Fyle.

Në takimin e sotëm të ministrave të jashtëm të Evropës Juglindore në Ohër, Kosova u përfaqësua nga zv.ministri i jashtëm, Petrit Selimi.
(RTK)