Ministria e Punëve të Jashtme e Kosovës, në emër të Qeverisë së Kosovës muajin e kaluar ka propozuar ambasadoren aktuale në Slloveni, Mimoza Ahmetaj, në detyrën e ambasadores së Kosovës në Mbretërinë e Belgjikës.



Kosovapress ka siguruar një kopje të propozimit që MPJ, më datë 27 maj 2013, i ka dërguar presidentes së Kosovës, Atifete Jahjaga, lidhur me këtë emërim.

Propozimin për këtë emërim, ministri i Jashtëm Enver Hoxhaj e ka bërë në emër të Qeverisë së Kosovës, duke u mbështetur në nenin 84, pika 25 e Kushtetutës së Republikës së Kosovës, nenit 2 (par.7.1) të Ligjit për Ndryshimin dhe Plotësimi të Ligjit për Ministrinë e Punëve të Jashtme dhe Shërbimit Diplomatik të Republikës së Kosovës.

Tashmë, mbetet që presidentja Jahjaga të vendos për dekretimit e ambasadores Ahmetaj. Ambasadorja Mimoza Ahmetaj pritet ta zëvendësoj në Bruksel ambasadorin Ilir Dugolli, i cili është propozuar që të jetë ambasador i Kosovës në Suedi.

Ndërkohë në MPJ, thonë se ky vendim i para më se 15 ditëve, është në kuadër të procesit të fuqizimit të shërbimit të jashtëm të Kosovës dhe në përputhje me ligjet dhe praktikat diplomatike që aplikohen në Kosovë dhe në shtetet demokratike.