Të gjitha profilet e arsimit më 1 qershor do t’i nënshtrohen testit në lëndët Gjuhë amtare, gjuhë angleze dhe matematikë, ndërsa më 15 qershor do t’i nënshtrohen provimit nga lëndët profesionale, sipas profileve përkatëse. Publikimi i rezultateve do të bëhet më 24 qershor.

Për t’iu shmangur manipulimeve gjatë mbajtjes së tij, për administrim, përveç mësimdhënësve të angazhuar, do të jenë të pranishëm edhe stafi akademik nga Universitetet Publike, deputetë nga Komisioni i Arsimit të Parlamentit të Kosovës dhe përfaqësues nga Këshilli Rinorë i nxënësve të Republikës së Kosovës, thotë Kryetari i Komisionit Qendrorë Shtetërorë të Maturës në Ministrinë e Arsimit, Shkencës dhe Teknologjisë, Nehat Mustafa. Sipas tij, numri i atyre që do ta mbikëqyrin këtë test arrin në katër mijë.

Sa i përket disa ankesave për pyetjet nga jashtë plan- programit, Mustafa thotë se kjo nuk është e mundur dhe se përpilimi i testit ka filluar prej kur ka përfunduar procesi i vitit të kaluar, duke u konsultuar me drejtorë, mësimdhënës dhe nxënës.
(Kosovapress)