Në një artikull të gjatë për Kosovën të botuar në gazetën prestigjioze izraelite, Haaretz, i bëhet thirrje shtetit të Izraelit, që të bëhet shteti i 100-të që njeh pavarësinë e Kosovës. Në artikull, përshkruhen inserte nga e kaluara e rëndë historike në Kosovë dhe rajon, si pasojë e dhunës së udhëhequr nga regjmi serb.
Po ashtu përshkruhen zhvillimet e fundit në procesin e normalizimit të marrëdhënieve ndërmjet Kosovës dhe Serbisë.
Në artikull citohet ministri i Jashtëm i Kosovës, Enver Hoxhaj duke hedhur poshtë të gjitha pretendimet se Kosova mund të shkojë drejt islamizimit radikal. “Ne jemi të drejtuar kah Evropa”, citohet ministri Hoxhaj.
Në artikull përshkruhen edhe raportet dhe respekti institucional e shoqëror për trashëgiminë kulturore e fetare, si dhe komunitetin hebraik në Kosovë. Në shkrim citohet edhe kryeministri Hashim Thaçi duke hedhur poshtë pretendimet serbe rreth Kosovës.
“Kosova është një rast unik, dhe si rezultat, pavarësia e saj nuk mund të shërbejë si precedent. Përkundrazi, liria e saj do të jetë një gurëthemel për stabilitetin në Ballkan, i cili do të hyjë në një epokë të bashkëpunimit dhe paqes”, citohet kryeministri Thaçi.
Pesë vjet pas pavarësisë, sipas artikullit, është e qartë se Thaçi kishte të drejtë.
Në artikull thuhet se Izraeli duhet t’i qëndroj besnik parimit të vetëvendosjes, mbi të cilin u themelua dhe se duhet të jetë pjesë e botës së përparuar e cila njeh aspiratat kombëtare të një populli të shtypur që ka vuajtur masakra, përdhunime dhe spastrim etnik.
“Izraeli, mundet dhe duhet të jetë shteti i 100-të që e njeh Kosovën. Jo vetëm për hir të Kosovës, por për hir të vetvetes”, përfundon artikulli i Haaretz.