Avokati i Popullit, Sami Kurteshi ka pritur sot në një takim të veçantë Komisaren e Lartë të Kombeve të Bashkuara për të Drejtat e Njeriut, Navi Pillay, e cila po qëndron në një vizitë dy ditore në Kosovë.



Biseda u përqendruar në funksionimin e Institucionit të Avokatit të Popullit(IAP), përfshirë këtu pavarësinë e institucionit, buxhetin e mjaftueshëm, objektin dhe marrëdhëniet me autoritetet në Kosovë, si dhe mundësinë e akreditimit të IAP-së në organizatat e mekanizmat ndërkombëtar të të drejtave të njeriut.

Gjithashtu gjatë takimit u vu theks i veçantë në numrin në rritje të ankesave, si dhe në zbatimin e rekomandimeve të IAP-së.

Po ashtu u bisedua lidhur me Ligjin për IAP-në, mangësitë dhe mundësinë e plotësimeve e korrigjimeve të nevojshme me rastin e amandamentimit; lidhur me Ligjin Kundër Diskriminimit, si dhe u fol për punën që po bëhet lidhur me mekanizmin për parandalimin e torturës, bashkëpunimit me shoqërinë civile, si dhe mënyrat e bashkëpunimit me mekanizmat ndërkombëtar të të drejtave të njeriut.
(RTK)