Raporti i publikuar nga Organizata Freedom House për Kosovën është shqetësues për Aleancën për Ardhmërinë e Kosovës. Sekretari i kësaj partie, Burim Ramadani duke komentuar të gjeturat e raportit tha se niveli i demokracisë në vend është i rëndë dhe për këtë fajëson Qeverinë e Hashim Thaçit.



Sipas Ramadanit janë tri dukuri negative: korrupsioni, reketi dhe fajdeja për të cilat AAK ka bërë planin për zhdukjen e tyre.

Ndërkaq mediat janë interesuar të dinë nëse edhe AAK-ja ndihet përgjegjëse për këtë situatë, duke i kujtuar atij se në disa raste janë identifikuar edhe njerëz të këtij subjekti, që kanë përfituar në formë jo ligjore. Ramdani është përgjigjur se: pa marr parasysh se kush janë këta persona, ata duhet të ndiqen penalisht.

“Nuk është fare e rëndësishme kush janë emrat dhe mbiemrat konkret. Ata që bëjnë dukuri negative kushdo që janë duhet të shkojnë para drejtësisë. Dhe për këtë po i bëjmë thirrje Qeverisë, Ministrisë së Brendshme dhe të gjitha strukturave udhëheqëse që ta zbatojnë ligjin. Fare nuk ka rëndësi kush është personi, ata që bëjnë gjëra të tilla, duhet të shkojnë para drejtësisë”.
(RTK)